ᐹᓇᑯᓪᔅ, ᑲᐅᒪᔾᔅ

ᐃᙱᐅᓯᓕᐅᖅᑎ ᐊᒻᒪᓗ ᓄᓇᓕᖕᓂ ᐱᓕᕆᔨ ᐃᓅᓚᐅᖅᓯᒪᔪᖅ ᐃᖃᓗᖕᓂ (ᓄᓇᕗᑦ) 1951-ᒥ – ᐃᓅᔪᓐᓃᓚᐅᖅᓯᒪᔪᖅ 1979-ᒥ.

ᖃᐅᒪᒋᐊᖅ ᐊᕐᓇᑲᓚᒃ, ᖃᐅᔨᒪᔭᐅᒻᒥᔪᖅ ᐊᓇᑲᓚᒃ, ᐃᓅᓚᐅᖅᓯᒪᔪᖅ 1951-ᒥ ᕗᕉᐱᓱ ᐸᐃᒥ (ᐅᓪᓗᒥ ᐃᖃᓗᐃᑦ), ᓄᓇᓕᕐᔪᐊᖅ ᓄᓇᑦᓯᐊᕐᒦᑦᑐᖅ, ᐊᖓᔪᖅᑳᖃᕐᕕᐅᓕᓚᐅᖅᓯᒪᔪᖅ ᓄᓇᕗᒻᒥ ᓄᓇᕗᑦ ᓴᖅᑭᑕᐅᒻᒪᑦ 1999-ᒥ.

ᖃᐅᒪᒋᐊᖅ ᐊᕐᓇᑲᓚᒃ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᓚᐅᖅᓯᒪᔪᖅ ᕗᕉᐱᓱ ᐸᐃᒥ, ᐊᒻᒪᓗ ᑲᔪᓯᓪᓗᓂ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕐᓂᕐᒥᓂᒃ ᑰᔾᔪᐊᕐᒥ ᓴᓇᔨᕈᕆᐅᖅᓴᓂᕐᒧᑦ ᐃᓕᓐᓂᐊᕐᕕᖕᒥ, ᐃᓕᓐᓂᐊᕐᕕᒃ ᐃᓂᖃᖅᑐᖅ ᐅᓇᑕᖅᑐᒃᓴᓄᑦ ᑐᔪᕐᒥᕕᐅᓚᐅᖅᓯᒪᔪᒥ ᑰᔾᔪᐊᕐᒥ, ᒫᓂᑑᐸᒥ. ᑖᓐᓇ ᐃᓕᓐᓂᐊᕐᕕᒃ ᐊᐅᓚᓚᐅᖅᓯᒪᔪᖅ 1964-ᒥᑦ 1973-ᒧᑦ ᐊᒻᒪᓗ ᐃᓕᓐᓂᐊᕆᐊᖃᑦᑕᖅᑐᑦ ᑭᒡᓕᖃᖅᑎᑕᐅᓪᓗᑎᒃ ᐃᓄᐃᑦ ᒪᒃᑯᒃᑐᑦ ᑲᓇᖕᓇᖓᓂ ᐅᑭᐅᖅᑕᖅᑐᒥᐅᓄᑦ. ᖃᐅᒪᒋᐊᖅ ᐊᕐᓇᑲᓚᒃ ᑕᕝᕗᖓ ᐃᓕᓐᓂᐊᕐᕕᖕᒧᐊᓚᐅᖅᓯᒪᔪᒃᓴᐅᔪᖅ 1960 ᓄᙳᐊᓂ. ᐊᓱᐃᓛᒃ ᐃᖅᑲᓇᐃᔭᓕᓚᐅᕐᑐᖅ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ. ᑖᒃᑯᐊ ᑲᑐᔾᔨᖃᑎᒌᑦ ᑭᒡᒐᖅᑐᐃᓚᐅᖅᑐᑦ 14,000-ᓂᒃ ᐃᓄᓐᓂᒃ 13-ᓂᒃ ᓄᓇᓕᓐᓂᒃ ᕿᑭᖅᑖᓗᒻᒥ (ᐅᓪᓗᒥ ᕿᑭᖅᑖᓗᒃ) ᐊᒻᒪᓗ ᓴᖅᑭᔮᖅᑎᑦᑎᓪᓗᑎᒃ ᐃᓅᓯᓕᕆᓂᕐᒧᑦ ᒪᑭᒪᔾᔪᑎᔅᓴᖏᓐᓂᒃ. ᑲᑐᔾᔨᖃᑎᒌᑦ ᐊᑎᖓ ᐊᓯᔾᔨᖅᑕᐅᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) 1996. ᕿᑭᖅᑕᓃᒃᑯᑦ ᓯᕗᓕᖅᑎᐅᖃᑦᑕᖅᓯᒪᔪᑦ ᐃᓄᐃᑦ ᓄᓇᑖᕐᓂᕐᒧᑦ ᐋᔩᖃᑎᒌᒍᑎᖏᓐᓂ ᐊᒻᒪᓗᑦᑕᐅᖅ ᓴᐳᔾᔨᔨᐅᓯᒪᓪᓗᑎᒃ ᑕᐃᔅᓱᒪᓂᑐᖃᕐᓂᒃ ᐃᓕᖅᑯᓯᑐᖃᖏᓐᓂᓪᓗ ᕿᑭᖅᑕᓂ ᐊᕕᑦᑐᖅᓯᒪᔪᓂ ᓄᓇᕗᒻᒥ.

ᖃᐅᒪᒋᐊᖅ ᐊᕐᓇᑲᓚᒃ ᑎᑎᕋᓚᐅᖅᑐᖅ ᑕᓪᓕᒪᓂᒃ ᐃᙱᐅᓯᕐᓂᒃ ᒪᕐᕉᖕᓂᒃ ᐅᖃᐅᓯᓕᖕᓂᒃ (ᖃᓪᓗᓈᑎᑐᑦ, ᐃᓄᒃᑎᑐᑦ) ᐊᑯᓐᓂᖓᓂ 1975 ᐊᒻᒪ 1976. ᐃᙱᐅᓰᑦ ᑕᐃᒎᓯᖃᖅᐳᑦ: “ᑐᒃᓯᐊᕐᓂᖅ“ (1975), “ᐃᙱᐅᓯᖅ ᕿᒻᒥᓐᓄᑦ” (1975), “ᐃᓕᓴᐃᔨᒐ” (1975), “ ᐅᑭᐅᖅᑕᖅᑐᒥ ᖃᐅᒪᐃᑦ” (1975) ᐊᒻᒪᓗ “ᑐᓴᒐᒃᓴᖅ ᑎᑭᓚᐅᖅᑐᖅ ᐃᓄᒃᑎᑐᑦ” (1976). ᐃᙱᐅᓰᑦ ᓴᖅᑭᑕᐅᓚᐅᕐᑐᑦ ᐃᓄᐃᑦ ᑕᐱᕇᓴᒃᑯᑦ ᖃᑯᑎᒃᑯᑦ ᐃᓄᐃᑦ ᑕᖅᑭᑕᒫᖅᓯᐅᑎᖓᓐᓂ = ᐃᓄᐃᑦ ᐅᑉᓗᒥ, ᐊᑎᖓ ᐊᓯᔾᔨᕐᑕᐅᓚᐅᕐᑐᖅ ᐃᓄᐃᑦ ᐅᓪᓗᒥ 1975-ᖑᑎᓪᓗᒍ, ᖃᐅᒪᒋᐊᖅ ᐊᕐᓇᒃᑲᓛᑉ ᓯᕗᓪᓕᖅ ᒪᕐᕉᒃ ᐃᙱᐅᓯᖏᑦ ᓴᖅᑭᑕᐅᓂᖏᑕ ᐊᑯᓐᓂᖓᓂ. ᑖᓐᓇ ᐃᙱᐅᓯᖅ “ᐅᑭᐅᖅᑕᖅᑐᒥ ᖃᐅᒻᒪᖅᑯᑏᑦ” ᖃᐅᒪᒋᐊᖅ ᐊᕐᓇᑲᓛᑉ ᑐᓴᐅᒪᔭᐅᓂᖅᐹᖑᓚᐅᖅᑐᖅ ᑎᑎᕋᐅᓯᖏᓐᓂᒃ. ᓴᖅᑭᑕᐅᒃᑲᓐᓂᓚᐅᖅᑐᖅ ᑐᓴᒐᒃᓴᑎᒍᑦ 1977-ᒥ, ᐊᒻᒪᓗ ᐱᐊᓂ ᐲᑐᕉᓐ ᑲᓇᑕᒥ ᐃᓄᐃᑦ ᑎᑎᕋᐅᓯᖏᑦ ᑲᑎᖅᓱᖅᑕᐅᓯᒪᔪᑦ ᐅᑭᐅᖅᑕᖅᑐᒥ ᓂᐱᖏᑦ: ᐃᓄᐃᑦ ᑎᑎᕋᖅᓯᒪᔭᖏᑦ ᖃᓪᓗᓈᑎᑐᑦ (1988, 1992). ᑕᕝᕙᓂ ᐃᙱᐅᓯᕐᒥ, ᖃᐅᒪᒋᐊᖅ ᐊᕐᓇᑲᓚᒃ ᓇᓕᖅᑭᐅᑎᕗᖅ ᐊᒻᒪ ᐊᔾᔨᒌᙱᓐᓂᖏᓐᓂ ᐅᓂᒃᑳᖅᑐᐊᖑᔪᓂ ᐊᒻᒪ ᖃᐅᔨᒪᔨᐅᔪᓄᑦ ᓇᓗᓇᐃᔭᐃᓂᐅᔪᓂ ᐅᑭᐅᖅᑕᖅᑐᒥ ᖃᐅᒪᓂᐅᔪᓄᑦ ᐊᒻᒪ ᖁᕕᐊᓲᑎᖃᓕᖅᑐᓂ ᐱᐅᔪᒻᒪᕆᐅᓂᖏᓐᓂ. ᐊᓯᐊᑦᑕᐅᖅ ᑎᑎᕋᖅᑎ ᐊᒻᒪ ᑎᑎᖅᑐᒐᖅᑎ ᓄᓇᕗᒻᒥᐅᖅ, ᐊᓗᑐᒃ ᐊᐃᐱᓕ ᖁᕕᐊᒋᔭᖃᓚᐅᕐᒥᔪᖅ ᐅᑭᐅᖅᑕᖅᑐᒥ ᖃᐅᒻᒪᖅᑯᑎᓂᒃ ᐊᒻᒪ ᑎᑎᖅᑐᒐᓚᐅᖅᑐᓂ ᖃᐅᒪᒋᐊᖅ ᐊᕐᓇᑲᓛᑉ ᐃᙱᐅᓯᖓᓂᒃ “ᐃᙱᐅᓯᖅ ᕿᒻᒥᓐᓄᑦ”. ᖃᐅᒪᒋᐊᖅ ᐊᕐᓇᑲᓛᑉ ᐃᙱᐅᓯᖏᑦ ᓴᖅᑭᔮᖅᑎᑦᑎᕗᑦ ᓄᓇᓕᖓᑕ ᐃᓕᖅᑯᓯᑐᖃᖏᓐᓂᒃ ᐊᒻᒪᓗ ᑕᐃᔅᓱᒪᓂᑐᖃᕐᓂᒃ.

ᖃᐅᒪᒋᐊᖅ ᐊᕐᓇᑲᓚᒃ ᒪᒃᑯᒃᖢᓂ ᐃᓅᔪᓐᓃᓚᐅᖅᓯᒪᔪᖅ 28-ᓂᒃ ᐅᑭᐅᖃᖅᖢᓂ 1979-ᖑᑎᓪᓗᒍ.