ᐅᓂᒃᑳᖅᑐᐊᖅᑎ, ᐊᖑᓇᓱᒃᑎ ᐊᒻᒪᓗ ᐃᓄᒃ ᐃᓐᓇᑐᖃᖅ ᐃᓅᓚᐅᖅᓯᒪᔪᖅ ᓴᓂᑭᓗᐊᑉ ᖃᓂᒋᔮᓂ (ᓄᓇᕗᑦ) 1890 ᖃᓂᒋᔮᓂ – ᐃᓅᔪᓐᓃᓚᐅᖅᓯᒪᔪᖅ ᐃᓄᒃᔪᐊᒥ (ᓄᓇᕕᒃ) ᐱᒋᐊᓕᓵᖅᑎᓪᓗᒋᑦ 1970-ᖏᑦ.
ᐊᑯᓕᐊᑉ ᐊᑎᕈᓯᖓ ᖃᐅᔨᒪᑐᐃᓐᓇᖅᑕᕗᑦ, ᑐᑭᖃᖅᑐᖅ “ᐃᔨᐅᑉ ᐊᑯᓐᓂᖓᓂ” ᐅᕝᕙᓘᓐᓃᑦ “ᑮᓇᖓ” ᐃᓄᒃᑎᑐᑦ ᐅᖃᐅᓯᖓᒍᑦ ᖃᓪᓗᓈᑦ ᓄᓇᖓᓐᓂ ᕿᑭᖅᑖᓘᑉ ᐊᕕᒃᑐᖅᓯᒪᓂᖓᓂ (ᑕᐃᔭᐅᕙᖕᒥᔪᖅ ᕿᑭᖅᑕᓂ ᐅᕝᕙᓘᓐᓃᑦ ᕿᑭᖅᑖᓘᑉ ᐊᕕᒃᑐᖅᓯᒪᓂᖓ). ᐊᑯᓕᐊᖅ ᓄᓇᐅᑉ ᑕᐃᒎᓯᖓᑦᑕᐅᖅ, ᑐᕌᖓᔪᖅ ᖁᑦᑎᒃᑐᒧᑦ ᐊᑯᓕᐊᕐᒧᑦ, ᐅᖓᕙᐅᑉ ᕿᑭᖅᑕᖓᓂ (ᓄᓇᕕᒃ). ᑖᓐᓇ ᐃᓄᒃ ᐃᓐᓇᑐᖃᖅ ᓴᓂᑭᓗᐊᕐᒥᐅᑕᖅ, ᓄᓇᓖᑦ ᐅᐊᓐᓇᖓᓂ ᓯᔾᔭᖓᑕ ᕗᓘᕆ ᕿᑭᖅᑕᖓᑕ, ᑕᓯᐅᔭᕐᔪᐊᕐᒥ, ᐅᓂᒃᑳᓚᐅᖅᑐᖅ ᐃᓅᓯᕐᒥᓂᒃ ᐃᓄᓕᕆᔨᒧᑦ ᐴᓇᑦ ᓵᓚᑎᓐ ᑎᐊᓐᒍᓗᒧᑦ, ᐊᐱᖅᓱᖅᑕᐅᑎᓪᓗᒍ ᐃᓄᒃᔪᐊᒥ ᑎᓯᐱᕆ 1967-ᒥ. ᑐᓂᓯᓚᐅᖅᑐᖅ ᑎᑎᕋᕐᕕᒃᓴᒥᒃ ᐊᑐᖅᐸᒃᑕᒥᓂᒃ ᑎᑎᕋᕐᕕᒋᕙᒃᑕᒥᓂᒃ ᐃᖅᑲᐅᒪᔭᒥᓂᒃ ᑎᑎᕋᐅᓯᒃᑯᑦ. ᐊᑯᓕᐊᖅ ᑎᑎᕋᓚᐅᖅᑐᖅ ᐊᓈᓇᑦᓯᐊᒥᓄᑦ ᐱᕈᖅᓴᔭᐅᓚᐅᕐᓂᖓᓂᒃ, ᐊᓈᓇᑐᐊᕆᓚᐅᖅᓯᒪᔭᖓᓂᒃ; ᐅᖃᐅᓯᖃᓚᐅᕐᑐᖅ ᐃᑦᑐᕐᒥᓂᒃ ᑐᓄᓂᕐᒥᒃ ᐊᒻᒪᓗ ᐊᓈᓇᒥᓂᒃ ᐋᓕᓯ ᓇᐃᓐᔭᔪᒥᒃ, ᑭᓯᐊᓂᓕ ᐃᒻᒥᓂᒃ ᐃᓱᒪᓚᐅᕐᑐᖅ ᐊᑖᑕᖃᙱᑦᑐᒥᒃ ᓄᑕᕋᕐᒥᒃ. ᐊᑯᓕᐊᑉ ᐊᓈᓇᑦᑎᐊᖓ ᓇᑦᑎᕋᓱᖃᑦᑕᓚᐅᖅᑐᖅ ᓇᐅᔭᕋᓛᓂᓪᓗ ᐅᐃᖓᑕ ᐃᕐᓂᖏᒃ ᒪᕐᕉᒃ ᐱᖃᑎᒋᓪᓗᒋᑦ, ᓵᒻᕕᓕ ᐊᕐᓵᐸᖅ ᐊᒻᒪᓗ ᑖᓂᐅᓪ ᓱᓘᓯ, ᐊᒻᒪᓗ ᖃᐅᔨᒪᔭᐅᑦᑎᐊᓚᐅᖅᑐᖅ ᐊᖑᓇᓱᒍᓐᓇᕐᓂᕐᒥᓄᑦ, ᐊᒻᒪᓗᑦᑕᐅᖅ ᒥᖅᓱᖅᑎᐅᓪᓗᓂ ᒧᒃᓗᖕᓂᒃ (ᑲᒥᖕᓂᒃ). ᐊᑯᓕᐊᖅ ᕿᑐᕐᖓᕆᔭᐅᕙᓚᐅᖅᑐᖅ ᐊᓈᓇᑦᓯᐊᖓᑕ ᐃᙱᐅᓯᖏᓐᓄᑦ ᐅᓐᓄᑕᒫᑦ ᐊᒻᒪᓗ ᐱᕈᖅᓴᓪᓗᓂ ᐅᐊᑦᑎᔨᖓᑕ ᐊᑖᓂ ᐃᒡᓗᕕᒐᕐᒥ ᓴᓂᑭᓗᐊᑉ ᖃᓂᒋᔮᓂ. ᒪᒃᑯᒃᑑᓪᓗᓂ ᐃᓕᓚᐅᖅᓯᒪᔪᖅ ᖃᓄᖅ ᐊᑐᕆᐊᒃᓴᖅ ᓇᓴᕐᒥᒃ. ᐊᓈᓇᑦᑎᐊᖓ ᐃᓅᔪᓐᓃᓚᐅᖅᑎᓪᓗᒍ, ᐊᑯᓕᐊᖅ ᐅᖃᐅᑕᐅᓯᒪᕗᖅ ᓄᓕᐊᖃᓚᐅᕐᓂᖓᓂᒃ ᐊᕐᓇᒥᒃ ᓄᑲᖅᑎᐅᓂᖅᓴᒻᒪᕆᖕᒥᒃ ᐃᒻᒥᓂᒃ.
ᐊᒥᐊᒃᑯᔪᖅ ᐊᑯᓕᐊᕐᒥᒃ ᑎᑎᕋᖅᓯᒪᔪᖅ ᐅᓂᒃᑳᖅ ᓄᑕᕋᐅᓪᓗᓂ ᐊᓈᓇᑦᓯᐊᒥᓂᒃ ᐱᖃᑎᖃᓚᐅᖅᓯᒪᓂᖓ, ᓴᖅᑭᑎᑕᐅᓚᐅᖅᑐᖅ 1995-ᒥ ᐱᖓᓱᓂᒃ ᐅᖃᐅᓯᖃᖅᑐᓂ (ᐃᓄᒃᑎᑐᑦ, ᖃᓪᓗᓈᑎᑐᑦ, ᐅᐃᕖᑎᑐᑦ) ᑕᐃᔭᐅᓪᓗᓂ ”ᐃᖅᑲᐅᒪᔾᔪᑎᖏᑦ ᐊᓈᓇᑦᓯᐊᕐᒪ. Souvenirs de ma grand-mère” ᑐᒥᕗᒥᑦ, ᐱᖅᑯᓯᓕᕆᓂᕐᒧᑦ ᐅᖃᓕᒫᒐᖅ ᓄᓇᕕᒻᒥ ᐃᓄᐃᑦ ᓄᓇᖏᓐᓂᑦ. ᐊᑯᓕᐊᖅ ᐅᓂᒃᑳᓕᐅᓚᐅᕐᒥᔪᖅ ᐊᓯᐊᓂᒃ, ᐅᓂᒃᑳᖅᑐᐊᖅ ᖁᖅᓱᓛᑦ (ᐅᕝᕙᓘᓐᓃᑦ ᖁᕐᓱᓛᖅ), ᖃᐅᔨᒪᔭᖓ ᐃᓄᖕᒥᒃ ᐊᑎᖃᖅᑐᒥᒃ ᖃᕐᕕᒃᒥᒃ, ᐊᒻᒪᓗ ᑎᑎᕋᓚᐅᕐᒥᔭᖓ ᑎᑎᕋᕐᕕᒃᓴᒥ ᐴᓇᑦ ᓵᓚᑎᓐ ᑎᐊᖕᓘᕆᐅᑉ ᑐᓂᓚᐅᖅᑕᖓᓂ. ᖁᖅᓱᓛᑦ, ᐱᖃᓐᓇᕆᔭᐅᓚᐅᖅᑐᖅ ᐊᒻᒪᓗ ᐊᖑᓇᓱᖃᑎᒋᕙᓚᐅᖅᑕᖓ ᐊᑯᓕᐊᑉ ᐊᓈᓇᑦᓯᐊᖓᑕ, ᓄᓕᐊᖃᓚᐅᖅᑐᖅ ᑐᐊᕐᖓᕐᒥᒃ, ᑕᕐᓂᕐᓗᒃᑐᒥᒃ ᐊᐅᓚᑕᐅᔪᓐᓇᖅᑐᒥᒃ ᐊᒻᒪᓗ ᐊᐅᓚᑕᐅᔪᓐᓇᖅᑐᒥᒃ ᑭᓯᐊᓂ ᐊᖓᒃᑯᓄᑦ. ᖃᕐᕕᒃ, ᕿᒫᑎᑕᐅᓚᐅᖅᑐᖅ ᑖᒃᑯᓄᖓ ᐊᐃᑉᐸᕇᓐᓄᑦ ᐊᑯᓂᑲᓪᓚᒃ, ᑕᑯᓚᐅᖅᑐᖅ ᑕᐸᐃᕐᓇᖅᑐᓂᒃ ᐊᑐᕐᓂᕆᔭᖏᓐᓂᒃ. ᖁᖅᓱᓛᑦ ᓂᕆᔭᐅᖏᓐᓇᓚᐅᖅᑐᖅ ᐊᐃᑉᐸᖓᓄᑦ, ᑕᐃᒪᓐᓇ ᒪᒃᑯᒃᑑᓂᖓᓄᑦ ᑐᓂᓯᓚᐅᖅᑐᖅ ᐊᒻᒪᓗ ᐊᐃᑉᐸᕇᒃ ᐃᒡᓗᖓᑦ ᔭᒐᐃᓪᓗᓂ ᓴᖅᑭᑲᓐᓂᖅᑐᓂᓗ ᒪᓕᒃᑐᓂ ᑐᐊᕐᖓᐅᑉ ᐱᔪᒪᔭᖓᓂᒃ. ᖁᖅᓱᓛᑦ ᐃᑲᔪᖅᑎᒋᓪᓗᓂᐅᒃ ᐅᐃᖓᑕᓗ ᓴᓐᖏᓂᖃᖅᑎᓪᓗᒍ, ᐊᑯᓕᐊᑉ ᐊᓈᓇᑦᑎᐊᖓ ᓄᖑᕈᑎᓚᐅᖅᓯᒪᓐᖏᑦᑐᖅ ᓂᕿᒥᒃ. ᐊᑯᓕᐊᖅ ᐃᓱᒪᒋᔭᐅᔪᖅ ᑎᑎᕋᖅᑎᓪᓗᐊᑕᐅᓂᖓᓂᒃ ᖁᖅᓱᓛᑉ ᐅᓂᒃᑳᖓᓂᒃ ᐊᒻᒪᓗ ᐅᓂᒃᑲᐅᓯᕆᔭᐅᓯᒪᓪᓗᓂ ᐊᓯᖏᓐᓄᑦ ᐃᓄᖕᓄᑦ ᐅᓂᒃᑳᖅᑐᐊᖅᑎᓄᑦ ᓲᕐᓗ ᓘᓯ ᕖᑕᓗᒃᑐᒧᑦ. ᐴᓇᑦ ᓵᓚᑎᓐ ᑎᐊᖕᓗ ᐅᓂᒃᑳᒃᑲᓐᓂᓚᐅᖅᑐᖅ ᑖᔅᓱᒥᖓ ᐅᓂᒃᑳᒥᒃ ᐊᒻᒪᓗ ᑎᑎᕋᓚᐅᖅᑐᖅ ᐱᖓᓱᓂᒃ ᐃᓕᓐᓂᐊᕈᑎᒃᓴᓂᒃ: ᑯᐸᐃᒃᒥ 1992-ᒥ; ᐃᓄᓕᕆᓂᕐᒥᒃ ᐃᓅᓯᓕᕆᓂᕐᒥᓪᓗ 1998-ᒥ ᐊᒻᒪᓗ ᐃᓄᓕᕆᓂᕐᒥᒃ 2003-ᒥ.
ᐊᑯᓕᐊᖅ 80 ᐅᖓᑖᓂ ᐅᑭᐅᖃᕐᓯᒪᔪᖅ ᐃᓅᔪᓐᓃᕐᑎᓪᓗᒍ ᐃᓄᒃᔪᐊᒥ (ᓄᓇᕕᒻᒥ). ᖃᐅᔨᒪᔭᐅᓗᐊᓚᐅᓐᖏᑦᑑᒐᓗᐊᖅ, ᑎᑎᕋᖅᓯᒪᔭᖏᑦ ᑐᓂᓯᓯᒪᕗᑦ ᐃᓄᓕᕆᔨᓄᑦ ᐊᒥᓱᓂᒃ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐅᓂᒃᑳᖅᑐᐊᓂᒃ ᕿᒥᕐᕈᓇᒍᓐᓇᖅᑐᓂᒃ. ᑖᓐᓇ ᐱᓕᕆᐊᖑᔪᖅ ᑲᔪᓯᑎᑕᐅᕗᖅ ᕗᓗᐊᕆᓐᔅ ᑑᐳᕆᒧᑦ ᐃᓄᓕᕆᓂᕐᒧᑦ ᖁᑦᑎᖕᓂᖅᓴᒧᑦ ᐃᓕᓐᓂᐊᕈᑎᒥᓂᒃ “ᐊᖓᔪᖅᑳᕆᔭᐅᔪᑦ ᓴᓇᓯᒪᓂᖏᑦ. ᓂᕈᐊᖅᑕᐅᓯᒪᔪᑦ, ᐊᑐᖅᑕᐅᕙᒃᑐᑦ ᐊᒃᑐᐊᓂᐅᔪᑦ ᐊᒻᒪᓗ ᓴᓇᔭᐅᓯᒪᔪᑦ ᓇᓗᓇᐃᒃᑯᑕᐃᑦ ᐃᓄᐃᑦ ᕿᑭᖅᑕᖏᓐᓂ (ᓄᓇᕗᑦ, ᐅᑭᐅᖅᑕᖅᑐᒥ ᑲᓇᑕᒥ)” (2014).